台語三音節同義並列式副詞

漢語時常透過同義詞並列ê方式合成一个新ê複合詞，m-kú，是以雙音節詞為主。本研究卻發現，台語內底存在bē少三音節同義並列式副詞，thang講是台語詞彙頂頭一个真大ê特色。而且，tsia-ê三音節同義並列式副詞tī構詞頂面，無論是按韻律ê角度抑是詞法結構ê角度來看，lóng kap漢語有真大ê精差。本研究透過日治時期語料ê分析發現，tsia-ê三音節副詞大多數是對兩个雙音節副詞透過並列ê方式所複合形成ê。有兩个必要條件促成這款新ê三音節複合副詞ê產生：第一，兩个有同義關係ê雙音節副詞ê連用、第二，兩个有共同詞素ê雙音節副詞ê連用。有一个制約機制影響複合ê選項，就是詞頻。當配對ê關係是複數關係ê時，通常，詞頻khah kuân hit兩个同義詞會得著複合ê機會。Koh，這款構詞型態tī台語內底有繼續teh生湠ê趨勢，真值得觀察。