是讀毋著，毋過，敢是烏白讀？－寡台灣話的誤讀情形分析－以少年人為主

本研究分析兩个世代攏總28位華台語雙語發音人、攏總14點鐘的自然語料。分析的重點是6个台灣話子音的誤讀情形。這6个子音是聲母［g］、［b］，佮韻尾［p］、［t］、［k］、［m］，6个攏是佮華語的音韻限制（phonotactics）有牴觸的音。結果顯示，老人組發音人雖然嘛攏真gâu講華語，毋過in的台灣話音韻系統猶原是相當穩定，因為誤讀音，差不多攏是少年發音人發的。除了單純的語音分析，本研究猶閣uì語言學的角度，來探討而且分析少年組發音人所有的誤讀音。結果發現這寡誤讀出來的音，毋是完全無規則通歸納的，顛倒有一寡脈絡會當參考：除了華語的第一語言轉移（L1 transfer）以外，本研究嘛針對應讀音佮取代音（substitute）之間的關係，歸納出4項原則。另外，台語語音除錯教學研究佮入聲韻尾的聲學特徵，嘛會當進一步解說入聲韻尾［p］的低誤讀率；啊「我」佮「阮」這兩字的［g］聲母流失率懸的原因，就可能佮詞頻（word frequency）有關。