台灣華語新興變異對台灣話ê影響－對少年人ê／iN／變異看起

本研究分析112位少年台華雙語人台華雙語ê語料，欲探討台灣話kap台灣華語ê／iN／變異，嘛欲了解台灣話ê／iN／變異敢有受著台灣華語ê影響。研究結果顯示，佇發音上，台灣話kap華語ê／in／攏無穩定，往／iŋ／合併ê趨勢真明顯，其中，台北比南部較明顯，女性比男性較明顯。比較起來，／iŋ／就加真穩定。台灣話ê／in／變異可能有受著台灣華語ê影響，尤其是台北。台北ê發音人，佇台灣話表現出來ê／in／變異ê情形，kap台灣華語ê表現差無濟。另外，kap華語ê聲母聲調表現攏仝款ê台灣話／in／韻字，往／iŋ／合併ê趨勢比相仝程度無遮明顯ê字較明顯。少年人ê台灣話／im／韻，除了過去受著注意ê／im／→／in／以外，這馬閣出現／im／→／iŋ／ê發展，這个新變異嘛會當看出／iŋ／咧／iN／韻裡面是較強勢ê地位。另外，這个／im／→／iŋ／ê變異，台北ê表現比南部較明顯。另外，佇／iN／聽辨ê部分，本研究採用Coach Test。結果發現，無論是台灣話抑是華語，變異ê程度攏比華語閣較大。會當講大部ê／iN／攏無予人正確聽出來。也就是講，台灣話kap台灣華語ê／iN／韻，攏有可能會變成近似合併（near merger）。